TITUS
Lancelot und Ginover I: Prosalancelot
Part No. 73
Previous part

Page: (154) 
Sentence: 976    Der truchses der als im syn herre gebot und ging zu dem thorn da beide kint inn waren mit ungemach, wann sie hetten beide sere geweynet und großenjamer gemacht; wann Lyonel hett sie alle die nacht und allen den tag allesampt mit großem ungemach gethan leben, wann er was der unsinnigste mensch in sim zorn der ye geborn wart, ane Lancelot alleyn.
Sentence: 977    Das wiste wol Galahuͦt der gut man, der herre was von den Fremden Werden; der nante yne zu eynem mal »eya, hetze one zaum«, wann yn nyman gekestigen kunde an demselben tag da yn der konig macht zu ritter, als uns das buch noch bescheiden sol wie das were.
Sentence: 978    Nu mögent ir horen wie sie Lyonel allesampt betrübet hett, das sie alle weinten und machten großen jamer alle die nacht und allen den tag.
Sentence: 979    Da Lyonel und syn bruder Bohort saßen uber der taveln des abendes da morgen der hoff solt sin groß und starck, da saß Phariens, ir beyder meistern und sah das Lyonel fast sere aß.
Sentence: 980    Er ließ yn eßen und besah das kint, und begund yn so sere jamern das im die trehen zun augen uß wielzen, und weint fast sere.
Sentence: 981    Diß treib er so lang an das des Lyonel gewar wart und prüfet es, wann er kunde wol ein ding geprüfen, er was beid, wise und kund wol sprechen.
Sentence: 982    »Aya lieber meyster«, sprach er, »warumb weint ir so sere uber uwerm eßsen?« Er sprach:
Sentence: 983    »Lieber juncker, was mag uch das gewerren das uch nit aneget?
Sentence: 984    lr ensolts auch nicht fragen zu recht!« »Entruwen, ich fragens und wil es uber ein wißen, und ich manen uch by den truwen die ir mir schuldig sint und mym bruder das ir mirs sagent!« »Aya lieber herre, durch gott gnad«, sprach er, »was sol uch das, das ir mich so großlich beschworn hant, umb das zu wißen das uch me bekumern mocht und betruben dann es uch ummer gefrömte?« »Somit die truw die ich mynes vatter sele leisten sol«, sprach Lyonel, »ich enwil númmer me eßsens enbißen, ich enwiß ec warumb ir so sere geweint habent!« »Entruwen junckherre«, sprach Phariens, »so ist beßser das ich uch sage dann ir ungeßen darumb verliebent.« »Nu sagent mir!« sprach Lyonel.
Sentence: 985    »Herre«, sprach Phariens, »ich weyn darumb, und jamert mich fast sere, das uwer hoch geschlecht so ser vergangen ist und irselb in uwerm land enmitten gefangen sint in uwerselbes thurne, und ein fremde man, der nicht darzu geborn ist, so groß herschagt tribet in uwerm lande und hoff heltet da ir zu recht hoff halten soltent und uwer herschafft triben.« »Wie«, sprach Lyonel, »heltet ein ander hoff da ich hoff solt halten?

Next part


This text is part of the TITUS edition of Lancelot und Ginover I: Prosalancelot.

Copyright TITUS Project, Frankfurt a/M, 7.5.2019. No parts of this document may be republished in any form without prior permission by the copyright holder.