TITUS
Lancelot und Ginover I: Prosalancelot
Part No. 69
Previous part

Page: (146) 
Sentence: 923    Alhie mußen wir diße rede laßen von den zweyn koniginnen und von dem bruder und furbas sagen von dem konig Claudas von der Wústung, wann wir múßen zum ersten ein wenig sagen von der jungfrauwen von dem Lack; da vernemt ir kurczlich wol warumb das ist gethan.
Sentence: 924    Da die jungfrauw vom Lack vernam das Lvonel und Bohort, des konig Bohortes kint von Gaune, gefangen wern in dem thorn zu Gaune, das sie Claudas yn her thun stießen, da was es ir fast leit, und gedacht lang wie sie die zwey kint ußer des konig Claudas gefengniß brecht.
Sentence: 925    Sie der manig gauckel und versucht wie sie ir dingk mocht angevahen, und erfriesch mit ir behendikeit das der konig Claudas solt ein großen hoff haben kurczlich und began das jargezytt als herlich als denselben tag da er gekrönt wart.
Sentence: 926    By den zyten spulgeten all die konig großen hoff zu halten iegliches jares desselben tages als sie gecrönet wurden.
Sentence: 927    Das groß fest was an Sant Marie Magdalenen tag alleweg.
Sentence: 928    An Sant Marie Magdalenen abent rief die jungfrauwe von dem Lac einer jungfrauwen zu ir, die fast schone was und wise von maniger behendikeit und was genant Sarayde.
Sentence: 929    Und ir frau sprach zu ir:
Sentence: 930    »Sarayde, ir múßent farn zu dem konig Claudas und múßent mir ein botschafft dar thun, und das ensol uch nit leyt syn, wann wir bringen zwey fast edele kint, die des konig Bohortes kint waren von Gaune!« Da lerte sie alles das sie thun solt, wie und wann sieß thun solt, als wir fúrter vernemen sollen, und gab ir alles das sie darzu bedorfft.
Sentence: 931    Die jungfrau nam urlob zu ir frauwen und reyt hinweg.
Sentence: 932    Ir frauw getruwet ir wol und hett sie freislich lieb.
Sentence: 933    Sie was des begebenen ritters nifftel, der von dem konig Claudas clagte vor dem konig Artus.
Sentence: 934    Da die jungfrau von dem lac reyt, da nam sie mit ir funff knappen und als mengen garzun und kam inn geritten in ein groß wiesen, lag vor der burg zu Gaune.
Sentence: 935    An Sant Marien tag zu meßzytt frü, einhalb an der wiesen kam ein walt zugestoßen, darinn entweich die jungfrauw und ir gesellschafft, und santen einen knappen in die burgk, das er wertet wann der konig Claudas uber der tafel seß.
Sentence: 936    Da er geseßsen was und syn ritter all, da ging der knapp zu syner jungfrauwen und saget ir das der konig geseßsen were.

Next part


This text is part of the TITUS edition of Lancelot und Ginover I: Prosalancelot.

Copyright TITUS Project, Frankfurt a/M, 7.5.2019. No parts of this document may be republished in any form without prior permission by the copyright holder.