TITUS
Lancelot und Ginover I: Prosalancelot
Part No. 29
Previous part

Page: (66) 
Sentence: 368    Die was ein gut frauw, wol- sprechende und schön.
Sentence: 369    Umb ir großen schöne wart sie Claudas minnende und det so vil das er ir mynne gewann, und macht durch yren willen yren man zu truchseßen uber alles das lant zu Galle, und macht yn rych von großen rechten und von großen lehen.
Sentence: 370    Der ritter was frumme und stolcz und genant Phariens.
Sentence: 371    Und Claudas sin herre ging so lang mit sym wibe umb, das ers geware ward und wart freischlich zornig, wann er nymant in der welt lieber hatt dann sin wip.
Sentence: 372    Und er wartet vil dick ob er des icht kund geprúfen an in beyden.
Sentence: 373    Eines tags geschah das Claudas vil hatt zu thun und sant den ritter alda er zu thun hett.
Sentence: 374    Der ritter fur hinweg und barck sich und kam herwiedder des nachtes und fand Claudas ligen by sym wibe in syner kammern.
Sentence: 375    Und er raufft syn schwert und wonde yn döten.
Sentence: 376    Und Claudas sah yn komen und sprang uß zu eim fenster und fur also hinweg.
Sentence: 377    Da er wol bekant das es Claudas was, da was im leyt das er yn nit hett dot geschlagen, und forcht sere das yn Claudas mocht döten.
Sentence: 378    Da gedacht er wie er sin huld wiedder gewúnde, wann er keyn krafft mocht gethun wiedder yn.
Sentence: 379    Er fur zu Claudas und rieff im zu eim rate beneben ab und saget im:
Sentence: 380    »Herre, ich bin uwer man, durch gott haltent mich zu recht von eim uwerm ritter, der mir groß laster hatt gethan und mynen frúnden und hat mir myn wip gelestert und gehönet, das clag ich gott und uch, herre, und allen mynen frúnden!« »Were ist der?« sprach Claudas.
Sentence: 381    »Herre, ich enweiß wer er sy, myn wip wil mirs nicht sagen, wann also vil saget sie mir das es uwer ritter eyner were.
Sentence: 382    Nu gebt mir radt, als ein herre billich sol synem knecht!« »Werlich«, sprach Claudas, »fúnd ich eynen by mym wib also ligende, möcht ich, ich döte yn.« »Werlich herr, ir hant wol gesprochen und recht.« Phariens nam urlub zu dem konig und fur wiedder zu syner burg und nam syn wib und beschloß sie allein off eim thorn, ir sere zu ungemach, ane alle gesellesschafft, ane ein alte quene die ir zu eßsen trug, und ensaget ir nicht warumb er das thete.

Next part


This text is part of the TITUS edition of Lancelot und Ginover I: Prosalancelot.

Copyright TITUS Project, Frankfurt a/M, 7.5.2019. No parts of this document may be republished in any form without prior permission by the copyright holder.