TITUS
Lancelot und Ginover I: Prosalancelot
Part No. 30
Previous part

Page: (68) 
Sentence: 383    Die frauw hett so viel ungemaches das sie nicht me enmocht.
Sentence: 384    Eins tags sah sie uß zu eynen fenster und sah eynen yren mag, eynen armen knappen, dem sie vil liebes hatt gethan, und rieff im zu ir und bat yn, als lieb als er sie hett, das er ging zu dem konig Claudas und saget im das sie beschlossen were durch synen willen in eynem thurn, das er ir dethe den radt das sie yn bespreche.
Sentence: 385    Sie wolt im sagen synen großen schaden den er genomen hett und nemen solt; ob er sie nicht bespreche, so wer es syn dott und auch der myn.
Sentence: 386    Der knapp fur zu Claudas und sagt im alles das im syn frauw bevalh zu sagen.
Sentence: 387    Unlang darnach geschach das Claudas jagte in dem walde von Gaune und gedacht wie er die frauw besprechen möcht, und hieß eynen knappen fur ryten zu Phariens huß sagen das der konig mit im wolt anbißen.
Sentence: 388    Phariens sprach das er im und gott wilkumme were, und macht sich als es im vil liep were.
Sentence: 389    Phariens ging zuhant und det die frauwen ußkomen und det sie wol zieren und schon, und deth gnung bereyten zu eßsenne und zu trinckene.
Sentence: 390    Da Claudas by die burg kam, da reyt Phariens gegen im und hieß yn wilkom syn und enpfing yn inn syn herberg lieblich.
Sentence: 391    Da Claudas gaß, da ging er und die frauw neben ab siczen off ein bette.
Sentence: 392    Und die frauwe begund im sere clagen das ir Phariens manig groß leyt thete durch synen willen, und bat yn durch gott das er ir darzu riet.
Sentence: 393    »Werlich frauw«, sprach er, »ich riet uch gern, wúst ich was.« »So wil ich uch raten wie ir mich rechent und uch, mynnent ir mich so sere als ich wol wene das ir thúnt und ich vil dick verschult han umb uch.« Da sprach Claudas:
Sentence: 394    »Ich wil uch geloben mit myner truwe das ich uns beyde an im riche, also das nyman gesprechen möge das ich undat daran begee, mag ich ummer die stat gewinnen.
Sentence: 395    Nu sagent mir wie, ich wil allen uwern rat thun.« »Herre«, sprach sie, »er weiß vil wol das irs warent den er by mir off dem bette fant.
Sentence: 396    Da sprach er durch syn schalckeyt das er nit wust wers were, er forcht das ir yn möchtent doten.
Sentence: 397    Ich wil uch noch beßer ursach sagen im zu thúne:

Next part


This text is part of the TITUS edition of Lancelot und Ginover I: Prosalancelot.

Copyright TITUS Project, Frankfurt a/M, 7.5.2019. No parts of this document may be republished in any form without prior permission by the copyright holder.