TITUS
Lancelot und Ginover I: Prosalancelot
Part No. 25
Previous part

Page: (58) 
Sentence: 311    da der vertriben ritter vernam das Montlahyr gewunnen was und Claudas darwert was geritten, da sante er eynen synen nefen zu der koniginne und bevalh im das er mit ir ritte zu dem closter da ir schwester inne was, die koniginn Alene.
Sentence: 312    Da er sie zu dem closter bracht da ir schwester inn was, und die eyn die ander gesah, da sol menglich wol wißen das sie beyde freud und unfreud gewunnen.
Sentence: 313    Sie hetten unfreud, wann eyn die ander arm sah und vertriben großer eren.
Sentence: 314    Anderhalb hetten sie freud, wann sie beyde by einander waren und die ein allweg sorg hett umb die andern, wie es mit ir stunde, und das yn die zyt kurczer were, ir groß leyt sampt weynende und zu clagende und yren großen ruwen, und das sie beyd sampt got solten dienen; wann gott zu dienen das ist die gröst zuversicht zu freuden.
Sentence: 315    Da die ein der andern hett geclaget yrn großen schaden und irs herren dott des konigs und wie sie enterbt weren, da clagt allermeyst die koniginn Alene von Bonewig und sprach:
Sentence: 316    »Owe leyder, ich han allzu vil verlorn, myn lant, mynen herren und mynen sone, der vor alle kint was schoner dann ein rose!
Sentence: 317    Ay liebe schwester, wo sint uwer kint nu?« Da vil sie zuhant in unmacht.
Sentence: 318    Da sie ir schwester in unmacht sah vallen, da viel auch sie in unmacht by ir, und alles das inn dem closter was macht großen jamer.
Sentence: 319    Da die koniginne von Gaune zu irselber kam, da begunde sie ir schwester allweynende zu sagen wie sie ir zwey kint verlorn hett.
Sentence: 320    »Ach arme«, sprach die koniginne von Bonewig, »nu sint wir leyder beyde on kint!« und saget ir schwester wie ir herre dot verleibe und wie ein jungfrauw mit irm kinde in den lac sprang.
Sentence: 321    Groß was ir beyder jamer und ir ruwe umb yrn großen verlust; und weren sie auch nit by einander gewesen, ir ruw wer vil mere gewesen und ir jamer und ir angst.
Sentence: 322    Die koniginn von Gaune enbot der abtißinn und deth zuhant ir hare abschnyden und wart nunne; wann der konig Claudas vol schalcket was, da getorste sie da mit nit lenger beyten, sie endete sich wilen.
Sentence: 323    Da sie gewilet wart, da enhetten sie keyn sorg vor im.
Sentence: 324    - Nun mußen wir diß rede laßen und sprechen furbaß von Lancelot und von der jungfrauwen vom Lac.

Next part


This text is part of the TITUS edition of Lancelot und Ginover I: Prosalancelot.

Copyright TITUS Project, Frankfurt a/M, 7.5.2019. No parts of this document may be republished in any form without prior permission by the copyright holder.