TITUS
Hartmann, Iwein
Part No. 4
Previous part

Verse group: (4) 
Verse: 301    dâ sluoc er an daz ez erhal
Verse: 302    und daz ez in die burc erschal.

Verse: 303    dar nâch was vil unlanc
Verse: 304    unz daz dort her vür spranc

Verse: 305    des wirtes samenunge,
Verse: 306    schœne unde junge

Verse: 307    junkherren unde knehte,
Verse: 308    gecleidet nâch ir rehte:

Verse: 309    die hiezen mich willekomen sîn.
Verse: 310    mînes rosses unde mîn

Verse: 311    wart vil guot war genomen.
Verse: 312    und vil schiere sach ich komen,

Verse: 313    dô ich in die burc gienc,
Verse: 314    ein juncvrouwen diu mich enpfienc:

Verse: 315    ich gihe noch als ich dô jach,
Verse: 316    daz ich nie schœner kint gesach.

Verse: 317    diu entwâfente mich.
Verse: 318    und einen schaden clage ich

Verse: 319    (des enwunder niemen),
Verse: 320    daz der wâfenriemen

Verse: 321    alsô rehte lutzel ist,
Verse: 322    daz sî niht langer vrist

Verse: 323    mit mir solde umbe gân.
Verse: 324    ez was ze schiere getân:

Verse: 325    ichn ruochte, soldez iemer sîn.
Verse: 326    ein scharlaches mäntelîn

Verse: 327    daz gap sî mir an.
Verse: 328    ich unsæliger man,

Verse: 329    daz sî mîn ouge ie gesach,
Verse: 330    dô uns ze scheidenne geschach.

Verse: 331    Wir zwei beliben eine.
Verse: 332    nu verstuont sich wol diu reine

Verse: 333    daz ich gerne bî ir was:
Verse: 334    an ein daz schœneste gras

Verse: 335    daz diu werlt ie gewan,
Verse: 336    dâ vuorte sî mich an,

Verse: 337    ein wênec von den liuten baz.
Verse: 338    daz liez ich weizgot âne haz.

Verse: 339    hie vant ich wîsheit bî der jugent,
Verse: 340    grôze schœne und ganze tugent.

Verse: 341    sî saz mir guetlichen bî:
Verse: 342    und swaz ich sprach, daz hôrte sî

Verse: 343    und antwurt es mit güete.
Verse: 344    ezn betwanc mîn gemüete

Verse: 345    unde bekumbert mînen lîp
Verse: 346    nie sô sêre maget noch wîp

Verse: 347    und getuot ouch lîhte nimer mê.
Verse: 348    ouwê immer unde ouwê,

Verse: 349    waz mir dô vreuden benam
Verse: 350    ein bote der von dem wirte kam!

Verse: 351    der hiez uns beidiu ezzen gân.
Verse: 352    dô muose ich rede und vreude lân.

Verse: 353    Dô ich mit ir ze tische gienc,
Verse: 354    der wirt mich anderstunt enpfienc.

Verse: 355    ezn gebôt nie wirt mêre
Verse: 356    sînem gaste grœzer êre.

Verse: 357    er tete den stîgen und den wegen
Verse: 358    manegen guetlîchen segen,

Verse: 359    die mich gewîset heten dar.
Verse: 360    hie mite sô übergulterz gar,

Verse: 361    daz er mich ir nie verstiez
Verse: 362    und mich sô güetlichen liez

Verse: 363    mit der juncvrouwen ezzen.
Verse: 364    Ouch enwart dâ niht vergezzen

Verse: 365    wirn heten alles des die kraft
Verse: 366    daz man dâ heizet wirtschaft.

Verse: 367    man gap uns spîse, diu was guot,
Verse: 368    dâ zuo den willigen muot

Verse: 369    Dô wir mit vreuden gâzen
Verse: 370    und dâ nâch gesâzen,

Verse: 371    und ich im hâte geseit
Verse: 372    daz ich nâch âventiure reit,

Verse: 373    des wundert in vil sêre,
Verse: 374    und jach daz im nie mêre

Verse: 375    dehein der gast wære komen
Verse: 376    von dem er hæte vernomen

Verse: 377    daz er âventiure suochte,
Verse: 378    und bat daz ich des geruochte,

Verse: 379    swenn ich den wec dâ wider rite,
Verse: 380    daz ich in danne niht vermite.

Verse: 381    dâ wider het ich deheinen strît:
Verse: 382    ich lobet ez und leistez sît.

Verse: 383    Dô slâfennes zît wart,
Verse: 384    dô gedâht ich an mîne vart.

Verse: 385    und dô ich niene wolde
Verse: 386    noch belîben solde,

Verse: 387    dô wart der rîterlîchen maget
Verse: 388    von mir gnâde gesaget

Verse: 389    ir guoten handelunge.
Verse: 390    diu süeze und diu junge

Verse: 391    diu lachet unde neic mir.
Verse: 392    seht, dô muose ich von ir.

Verse: 393    daz gesinde daz bevalch ich gote:
Verse: 394    ze mînes wirtes gebote

Verse: 395    dâ bôt ich mich vil dicke zuo.
Verse: 396    dan schiet ich unde reit vil vruo

Verse: 397    ze walde von gevilde.
Verse: 398    dâ râmet ich der wilde

Verse: 399    und vant nâch mitten morgen
Verse: 400    in dem walde verborgen

Next part


This text is part of the TITUS edition of Hartmann, Iwein.

Copyright TITUS Project, Frankfurt a/M, 6.5.2019. No parts of this document may be republished in any form without prior permission by the copyright holder.